بقينا لبعض

قصة قصيرة جدا .. عادية جدا

"لاكله الا الاكل .. خلى بالك بقى"

لا تعلم لماذا تذكرت -الان-  تلك المحادثة بينهما عندما قاطعته فجأة فى وسط كلامه

"هو أنت بتحب تاكل ايه؟!!"

"بصى أنا باكل أى حاجة .. الا الرز والطبيخ بكرههم جدا مع بعض"

مع ذلك الشعور الممتعض على وجهه وهو يتطق "الرز والطبيخ مع بعض" لم تجد الا 

"اممممممممممممم"

"لا كله الاكل .. خلى بالك بقى"

فى هذه اللحظة ابتسمت .. وشعرت انها اقرب اليه من حبل الوريد 

ولكنها لاتعلم

لماذا -الان- يبدو هذا اليوم بعيدا جدا وكأنه حدث من الف عام

او كأنها شاهدته فى فيلم عربى ... ولم تعايشه بنفسها

هل هى تفتقده .. أم انها فقط تفتقد ذلك الاحساس بأنه 

"خلاص حبيبتى بقينا لبعض ؟!! "

تايهة .. خايفة .. عاوزة حد ياخد بايدها ويعديها :(

شايفيين البنوتة دى ؟!!

تايهة شوية .. باص المدرسة فاتها وواقفة مش عارفة تلحقه .. ولا عارفة ترجع تانى البيت :(

عمالة تفكر فى اليوم الى ضاع منها من لعب مع صحابتها والفسحة والفصل وكل الحاجات دى

انهرده وانا راجع فى الشارع بالليل شوية

لقيت بنوتة شكلها فكرنى بالنوتة دى

واقفة خايفة تعدى عشان فى حمار مربوط وواقف

مديت لها ايدى بابتسامة بسيطة كدا

وطبعا بقلق برضه .. عشان لو حد من اهلها كان قريب وشافنى هيفتكر طبعا انى بخطفها مش انى عاوزة اعديها ولاحاجة :D

المهم البنوتة بكل بساطة مسكت ايدى

وعدينا سوا

وفجاة الخوف والرعب راح

ولقيت ابتسامة حلوة اوى ماشاء الله <3 <3 <3

بجد يعنى حسدتها

وحسيت انى عاملة زيها كدا بالظبط دلوقتى

واقفة خايف اعدى .. ومحتاجة حد يمسك ايدى ويعدينى :(

المراهقة وايامها ^_^

 

هما مش عاجبهم طريقتى فى الحياة ..
عادى وانا كمان مش عجبانى طريقتهم فى الدنيا
بس هما اللى ربونى .. يعنى من حقى اطالبهم يتأقلمو على نتيجة افعالهم
انما انا مربتش حد فيهم .. يبقى مش من حقهم يطالبونى انى أتأقلم على حاجة اتولدت لقيتها موجودة !!!

***

- ياماما انا بحب اتنى ايد القميص

- انتى بنت مش ولد .. افردى التنية :(

***

- هناكل ولا هنتفرج على التليفزيون ؟!!

- ماهو انا متابعة الحلقة !!!
- يبقى تسيبى الاكل لحد ماتفضى له .. الاكل له حرمة 

***

- مصاحبة بنات ببناطيل وبدى -

ايه الاشكال اللى انتى ماشية معاها دى ؟!! مش تختارى اصحابك

هتقضحينا فى البلد :(

***

- مصاحبة بنات اهلهم من جماعة الاخوان -

ولما يجو يخدونا امن دولة هتتبسطى بنفسك وباللى انتى ماشية معاهم دول !!!

 ***

مشهد نهار داخلى - عيادة دكتور العيون

- ايه ياعروسة مش نحافظ على عينا شوية ؟!! كدا هنحتاج نضارة

- شفتى ؟!! نضارة من دلوقتى ؟!! دا محدش من اللى فى سنك لبسوها ولايعرفوها

ادى اللى اخدناه من الجرايد والكتب 

***

اول يوم فى الاجازة - او بمعنى اصح اخر يوم فى الامتحانات-

- كتب كتب كتب !!! مافيش مصروف فى الاجازة .. اما نشوف هتجيبى كتب ازاى بقى !!!

***

الاسبوع التانى فى الاجازة

-هو كل يوم خروج ؟!! .. مافيش خروج تانى اللى عاوزك يجيلك هنا

***

الاسبوع التالت فى الاجازة

- كل يوم ناس ناس فى البيت ؟!! وصوتكو عالى اوى .. قولى لهم يوطو صوتهم شوية .. وبعدين مش معقول حد يروح لحد كل يوم يعنى ؟!!

***

الاسبوع الرابع فى الاجازة

- مش تتعلمى الطبيخ بقى حاجة تنفعك .. انتى فاكرة نفسك هتفضلى عايشة فى بيت ابوكو طول عمرك ولا ايه ؟!!

***

الاسبوع الخامس فى الاجازة

- يابنتى حرام عليكى بقالك اسبوع بتأكلينا أكل استغفر الله العظيم .. مش هتتعملى بقى !!!

- طيب ماهو اسبوع واول مرة اعمل حاجة 

- انا لما كنت فى سنك محدش علمنى حاجة .. انتو جيل بيدلع

***

الاسبوع السادس من الاجازة

- اخواتك هيخدو دروس ذاكرى معاهم بقى .. ولا الاولى على المدرسة على الفاضى ؟ّ!! كل يوم ذاكرى معاهم اللى خدوه اول باول

***

الاسبوع السابع فى الاجازة

بالراحة على اخواتك شوية .. دول فى اجازة وبعدين مش كل الناس دماغها زيك !!!

***

الاسبوع التامن فى الاجازة

- مش تروحى تزورى خالاتك وعماتك .. ولا كله اصحابك اصحابك ؟!! متعرفيش حاجة اسمها صلة الرحم

***

الاسبوع التاسع من الاجازة

- خالتك مين ؟!! انتى مش كنت عند خالتك التانية الاسبوع اللى فات ؟!! مش هنبطل خروج ودخول على الفاضى !!!

***

*

*

*

ويستمر ويتوغل وينتشر :(

حاجة لله ^_^

كل سنة وانتو طيبين يابشر ..

شهر رجب بدأ وبعده ان شاء الله شعبان ووراهم مباشرة رمضان

فى الفترة دى عموما بيزيد الشحاتين بطريقة رهيبة

فى مواقف العربيات بقى والشوارع وطبعا قدام لجان الثانوية العامة -اللى بدأو انهرده ربنا معاااااااااااااااهم -

وفى كل حتة فيكى يامصر

دا حتى عندنا فى البلد بيلفو يخبطو على البيوت يشحتو اى حاجة موجودة ان شاء الله شوية غلة !!!

بجد يعنى بستغرب واحدة او واحد ماشاء الله طول بعرض وعندها القدرة انها تلف فى الحر الفظيع دا وكمان تقول نفس الكلام ولو حد رد عليها رد بقلة ذوق شوية .. يعنى ناقص ايه بقى عشان تشتغل !!!

المهم .. دا نداء لكل حد هنا

ياريت متديش اى شحات اى حاجة.. حتى لو كان جنيه او شوية غلة

اولا الجمعيات الخيرية مافيش اكتر منها وانا شخصيا برشح لكم جمعية رسالة اى فرع على مستوى الجمهورية

الجمعيات غالبا بتدى للمستحقين بجد ورسالة بالذات اشهد ان مافيش مليم بيطلع غير للمستحق :D

 ساقية الصاورى كان متبنية شعار "لاتحرم المحتاج باعطاء المحتال " !!!

والقصص عن الشحاتين اللى واخدينها شغلانة وعندهم ملايين كتيرة ومش محتاجة انى ازودها واحدة

لكن محتاجة اقول نقطة مهمة

حال البلد دلوقتى كلنا عارفينه .. ممكن يكون جنبك حد من اهلك او من معارفك مش معاهم فلوس او محتاجين حاجة

"يَحْسَبُهُمُ الْجَاهِلُ أَغْنِيَاءَ مِنَ التَّعَفُّفِ"

.. صنايعى كسيب مثلا بس الحالة ناشفة الايام دى

موظف فى مكان والمكان دا فيه اضرابات فالقبض متأخر

سواق ميكروباص ياعينى الاضرابات موقعة نص شغله

راجل كبير طالع على المعاش والبوستة مش مظبطة مواعيدها وبتقفل بدرى

الناس دى كلها محتاجة مساعدتك

مش لازم مساعدة كبيرة ومش لازم تكون فلوس اساسا .. بس اى نوايا تسند الزير

جربو مش هتخسرو حاجة

واللى عنده اى حاجة فى البيت مستغنى عنها ومش عارف يوديها فين يبقى مافيش غير جمعية رسالة

عندهم مشروع ريسايكل بياخد اى حاجة

وكل سنة وانتو طيبين تانى بقى ^_^

صبحى صالح .. وشيزوفرينيا الاختيار

طبعا كلنا تابعنا الحوار الكبير اللى حصل بسبب كلام الاستاذ صبحى صالح عن ضرورة ان الاخ الاخوان يتجوز اخت اخوان برضه 

وبرضه ناس كتيرة اعترضت لدرجة ان فى ناس رفعت قضية عليه !!!

طيب بعيدا عن حوار الاخوان خالص وبعيدا طبعا عن انى مش اخوان ولكن الفكرة ذاتها

الفكرة ذاتها احنا بنعانى منها هنا فى مصر

(شيزفريينا الاختيار ) انا بسميها كدا

الولد الاخوان المفروض يتجوز ايه ؟!!

واحد معتنق فكر معين يبقى الطبيعى انه يتجوز فتاة معتنقة نفس الفكر 

نيجى مثلا للمهندس اللى بيرفض يتجوز مهندسة عشان بتتعامل مع العمال !!!

سبحان الله هى مش بنى ادم  زيك يعنى !!!

طيب الليبرالى اللى بات فى ميدان التحرير عشان اسقاط النظام .. انما البنت اللى بتتبع نفس النهج (ومتنسوش ان قوتنا كانت فى عددنا ايامها ) الولد دا يقولك لا انا مرضاش اختى تبات فى الميدان !!!
كان عندى واحدة صحبتى معيدة فى الجامعة الامريكية  مخطوبة لزميلها معيد برضه فى الجامعة الامريكية  .. وهما الاتنين كانو مقدمين على منحة لانجلترا

هى جات لها المنحة والمفروض يكون معاها مرافق .. قالها انا مروحش ادرس على حساب مراتى !!!

ايه التفكير دا ؟!!

معقول دا فكر معيد هندسة فى الجامعة الامريكية !!! امال انت خاطب معيدة زميلتك ليه وانتو الاتنين مقدمين على نفس المنحة يعنى !!!

يبقى الفكرة ايه بقى ؟!!

الفكرة انك كولد معتنق فكر معين يبقى انت شايف ان الفكر دا صح

وطبيعى عاوز ولادك يعتنقو نفس الفكر . يبقى مين هيربيهم على نفس الفكر !!!
واحدة دى فكرتها من زمان .. ولا واحدة انت هتخليها تعتنق الفكر دا !!!

طبعا مش هنتكلم بقى عن الاخ اللى بيمشى مع واحدة اه انما يتجوزها لا !!!

والاخ اللى يتطوع فى جمعية خيرية او يشتغل فى نشاط فى الكلية وبعدين تلاقيه حاطط رجل على رجل ويقولك انا عمرى مااتجوز واحدة من هنا !!!

دا حتى تمورة صفر الجيل بيقولك انا متجوزش ممثلة !!!

انما انت بتمثل ليه يااخ وواقف قدام بنات الناس تشتغل معاهم !!!

وعادل امام يقولك بنتى متشتغلش ممثلة !!!

لاحول ولا قوة الا بالله .. انت بنتك بنت ناس .. واللى انت بتمثل قدامهم ولاد ***

الاستاذ صبحى صالح ماقلش حاجة غلط على فكرة .. الراجل بيناقش قضية بنعانى منها فى المجتمع 

وهو بيحاول يحلها فى الجماعة بتاعته

بلاش نغمة الاسلاموفوبيا اللى مغرقة المجتمع دى 

لماذا أكتب ؟!!

كثيرا ماسألت نفسها "لماذا أكتب؟"

ودائما لاتجد الرد

أو لعلها تجده .. ولكنها تخبأه بعيدا عن عقلها الواعى

هذا العقل الواعى الذى كثيرا مانبهها أنها تحيا وحيدة .. وغالبا ستموت وحيدة .. بدون صحبة

وربما دون أن يشعر أحد برحيلها !!!

أن هذا أكثر مايزعجها حقا .. أن ترحل فلا يتذكر أحدهم قراءة الفاتحة على روحها .. ولايقوم آخر بشراء كفن .. وثالث بالاتفاق مع مغسلة ..ويقوم رابع بالتجهيز لآخر مشوار لجسدها فوق سطح الأرض 

ياترى من سيكون الاول ومن سيكون الثانى ومن الثالث ومن هو الرابع ؟!!

هل سيكونون حقا أربع ؟!! ام سيقوم بكل هذا شخص واحد ؟!!

اسئلة كثيرة تدور فى بالها .. هى لاتنشغل بالحياة قدر انشغالها بالموت .. ولكنها أيضا تدرك جيدا ان مسيرة حياتها هى التى ستحدد حال موتها

تعلم جيدا ان احداهن قد تقرا تلك الكلمات وتغضب وتشعر انها لاتتخذها صديقة 

لاتنزعجى ياعزيزتى .. بل دعينى أقول  .. لاتنزعجى ياصديقتى انتى بالفعل صديقتى .. ولكنى منذ أمد بعيد تعلمت الخوف من البوح للبشر .. وصاحبت الورقة والقلم قديما .. والان صاحبت مدونتى وحسابى على الشبكات الاجتماعية !!!

انتى صديقتى حقا .. ولذلك اطلب منى البحث عن اجابة هذا السؤال "لماذا أكتب؟" .. هل انشغالى بالموت يجعلنى اطلب بعض الخلود ببعض الكلمات ؟!!

***

ملحوظة على قدر من الاهمية .. 

سيزعجنى جدا الا تغضب احداهن من هذه الكلمات .. لم اكتبها خصيصا لازعجكن .. ولكنها يجب ان تكون مزعجة .. والا صدق عقلها الواعى !!!

***

ملحوظة اخرى .. على نفس ذات القدر من الاهمية

كان يجب ان تكون هذه التدوينة احياءا لنكسة يونيو 1967 .. لكن السؤال فرض نفسه على ّ !!!

انْتَهَت الْحَضْرَة يَامَوْلانَا .. عَد الَى دُنْيَا الْبَشَر

كَان لِقَاءَك كَالحَضِرة .. وَكَانَت كَلِمَاتِى ابْتِهَالَات

لَم أَكُن يَوْمَا مُؤْمِنا بِالصُّوفِيّة

لَم اقْتَنَع حِيْن حَدِّثُوْنِى ان هُنَاك مِن الْبَشَر مَن يَخْرُج خَارِج شُعُوْرِه بِجَسَدِه وَيَعْلُو بِنَفْسِه هُنَاك فِى الْسَّمَوَات

وَلَكِنِّى شَعَرَت بِهَذَا الْعُلُو يَوْم أَن وَقَعْت عَيْنَاى عَلَيْك

لِمَا يَقُوْلُوْن "فُلَان وَقَع فِى الْحُب" ؟!! .. انَا مَاوَقَعْت فِى حُبَّك ..
                              أَنَا ارْتَفَعَت بِه

وَلَكِن بَعْد وَهْلَة .. لَاأَدْرَى ان كَانَت طَالَت أَم قَصَرَت

وَجَدْتُك تُشْتَكَى مِنِّى .. وَتَقُوْلِيْن انّى اعَامْلك كَغَرِيبَة عَنّى !!!

كيف أُعَامِلُك كَغَرِيبَة !!! انّى فَقَط اعَامْلك كَأُمِيْرَة

انُتُى لسَّتَّى مِثْل صَدِيْقَاتِك وَانَا لَسْت مِثْل هَؤُلاء الاغْبِيَاء الَّذِيْن كَانُوْا مِن قَبْلِى يَتَعَامَلُوْن مَعَك كَمَا يَتَعَامَلُوْن مَع الْأُخْرَيَات

انُتُى فَرِيْدَة يَاأَمِيْرَتَّى .. وَانَا اعَامْلك بِتَفَرُّد

وَلَكِن يَبْدُو انَّك اعْتَدْتِى الْمُعَامَلَة كَفَتَاة عَادِيّة .. وَهَذَا مَالْن أَسْتَطِيْع أَن أَفْعَلَه مَعَك أَبَدا

لَيْس فَقَط لِان هَذَا مَاتَستَحِقِيْه .. وَلَكِن لِانّى اعْتَدْت ان أَكُوْن صُوْفِى فِى حَضْرَتِك

وَحَتَّى ان انْتَهَت الْحَضْرَة .. لَّايَمُوْت الْصُّوفِى

هُو فَقَط يَنْتَظِر حَضْرَة جَدِيْدَة لَيَعْلُو بِنَفْسِه هُنَاك فِى الْسَّمَوَات

***

مقام سيدنا الحسين .. جامع الحسين .. القاهرة ^_^

مسجد الحسين .. القاهرة

مسجد الحسين .. القاهرة
(زاوية تانية بقى )


***

ملحوظة مهمة جدا

تصاويرى اللى فوق دول ^_^

لأنها تخشى أفكارها !!!

الالتزام بالتدوين اليومى هو عملية متعبة بدون شك

وخصوصا لمن اعتادت الا تلتزم بأى جدول 

واعتادت ايضا ألا تلتزم بأى عادة 

حتى مواعيد الاستيقاظ والنوم تتغير كل اسبوعين ..

لدرجة انها تشعر بالارهاق الجسدى اذا التزمت بميعاد نوم لمدة تزيد عن الاسبوعين !!!

ولكن لم تكن هذه معضلتها الوحيدة

المعضلة الحقيقة ان تكتشف انها تخشى من أفكارها !!!
هى تمتلك العديد من الافكار - لن أقول االمئات - ولكن مازالت لديها الكثير والكثير لتكتب عنه وتتحدث به

ويحدث فى حياتها اليومية الكثير والكثير ايضا لتكتب عنه وتتحدث به

ولكنها تخشى من افكارها !!!

تخشى مما قد يظنه البعض بها

تخشى من شقفة البعض ...  وشماتة البعض الأخر

تخشى ان يصدم فيها من اتخذها قدوة فتخسر احد معجبى كتاباتها .. 

وايضا تخشى ان يعجب بكلامها من كان لا يقتنع به  فتكسب معجب جديد بكلامها يكون عبأ عليها فى الحديث القادم  ايضا !!!

تخشى أن تكتب مابداخلها .. فتتكشف امام نفسها .. وتتقشر تلك القشرة الضعيفة التى عاشت بداخلها كدودة قز 

انها تخشى من افكارها .. لانها تعلم انها كثيرا ماحمّلت عقلها فوق طاقته

وحمّلت الدنيا قلبها فوق مايطيق

وحمّلتها ظروفها فوق ماتستحق

وينظر اليها البعض أكثر مما هى عليه .. وينظر عليها البعض الاخر اقل مما هى عليه !!!

ملامح ضلت !!!

كثيرا ماأحاول تذكر كيف كانت تبدو طفولتى

ماذا كنت أحب .. وماذا كنت أكره

مَن مِن أصدقائى خطا معى خطوات طفولتى 

وَمن ِمن أهلى رسم ملامح شخصيتى

اسئلة كثيرة تدور فى ذهنى .. ومواقف أكثر أحاول رسمها  .. وقصص تُحكى أمامى أحاول التعايش معها

لكن كثيرا ماأبوأ بالفشل !!!

أشعر ان ملامحى ضلت منى .. او انى وُلدت فجأة هكذا دون أن أمر بمراحل سابقة .. حتى اننى لا أنتظر مراحل تالية

شعورى  بالاغتراب الداخلى  يتعاظم  يوما بعد يوم

حتى اننى اصبحت اتعجب من نفسى فى كثير من المواقف .. اصبحت أشعر انى لست بطلة فى حياتى

أنا مجرد مشاهدة اتابعنى وأنا اتصرف بدلا منى .. أراقبنى وأنا اتعامل مع من حولى بدلا منى

اختلف معى واخاصمنى واتعجب من اصرارى

لكن اكثر مااتعجب منه ... عندما يشكو الى احدهم مشكلتى

نعم انها مشكلته هو .. ولكنها ايضا مشكلتى 

فجأة اجدنى ارد وانصحه ماذا يفعل .. واتعجب منى انى امتلك الحل .. لكن لاأنفذه

فاتحدث مرة أخرى مع نفسى لعلى اقنعنى بأن أنفذ حلى ونصيحتى التى قلتها للآخرين منذ قليل

لكنى قليلا ماأنجح فى اقناعى !!!

كم مرة اقنعتنى ؟!! حتى هذا الملمح ضل منى :(

انا بعمل لله .. ايوا مش ببلاش يعنى

التدوينة انهرده موجهة للناس بتوع العمل التطوعى

بما انى مندمجة الايام دى يعنى فى 

جمعية رسالة فرع ميت غمر ^_*

طبعا لما بنتكلم مع بعض كمتطوعين او مع اى حد من برا

بيكون دايما كلامنا ان الواحد بيعمل لله ..

الناس  مقتنعة ان مافيش حاجة بتتعمل ببلاش دلوقتى

طيب وهو مين قال ببلاش !!!

مش بتقولى لله اهو !!!

اه وهو لله دى ببلاش يعنى ولا ايه ؟!!

امال ايه يابنتى بتاخدى فلوس

لا مش باخد فلوس .. باخد اكتر .. باخد الحسنة بعشر امثالها .. هو دا يبقى اسمه ببلاش !!!

المفروض البنى ادم مخلوق ليه ؟!!

عشان يعمر الارض طول ماهو عايش فى الدنيا دى .. وفى العالم الاخر يعيش فى الجنة

طيب يبقى انا لما بعمل عمل تطوعى انا مش بعمل ببلاش .. دا أنا بعمر الأرض .. يعنى بعمل شغلتى اللى اتخلقت عشانها

وكمان باخد حسنات عشان فى الحياة الاخرى اعيش فى الجنة

يعنى بمعنى اصح بدفع عشان اجهز البيت اللى هعيش فيه فى الآخرة

يبقى لله بقى معناها ببلاش !!!

طيب أنا بكتب الكلام دا ليه ؟!!

لانى بعد خلاف بسيط حصل امبارح فكرت انى بعمل لله .. يعنى ربنا هو صاحب الشغل بتاعى

ولما يحصل خلاف فى الشغل صاحب الشغل هو اللى بيحكم

طيب لما صاحب الشغل يقولى اعملى كذا كذا .. غصب عنى هعمل عشان ميقطعش عيشى .. صح ؟!!

طيب ربنا قالى

وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللّهُ يُحِبُّ الْمُحْسِنِينَ

يبقى انا اعمل ايه ؟!!

الجنة مش ببلاش .. ^_*