بحث هذه المدونة الإلكترونية

الأربعاء، فبراير 08، 2012

عـــبـــأ هـــش :)

هناك بعض الأمور قد تكون عبا كامل على اصحابها
الا انهم يفاجئون أن هذا العبأ هش جدااااااااااااا اذا وجدت فقط من يهتم بتشجيعك على حمله
فضلا عن تحمله معك :)
أبحث عن المزيد من الكلمات بحجة انه
" مينفعش يبقى الكلمتين دول هما البوست ايه الكروتة دى :D "

ولكنى أعود لأقول لنفسى 
" مادام الفكرة وصلت يبقى مالوش لازمة الرغى الكتير بقى ^_^ "

عموما سيبكو من خناقتى معايا
واسمعو أنغام :)


الثلاثاء، فبراير 07، 2012

بيان - اضراب جامعة بنها



نقلا عن شبكة رصد

http://www.facebook.com/photo.php?fbid=279797652097351&set=a.279797558764027.58130.103622369714881&type=1&theater

حـــــــــــــيــــــــــــــاة

فى وسط كل أخبار الموت التى يبدو أننا قد تكيفنا معها

أبحث أنا عن حـــــيـــــاة
كم يبدو هذا المطلب صعب المنال عندما يصادف هذا البحث أنباء موت مستمرة على المستوى العام
وانكسارات متتالية على المستوى الخاص
حتى العمل الخيرى الذى كان كل اهتمامى فى فترة سابقة 
لم أعد أجد الدافع الذى يجبرنى على استكماله
حتى اننى اعيد حسابات نيتى مرة أخرى

انه أمرا مزعج ان تكتشف ان حياتك بلا حياة 
وانك لم تعد البطل فى قصة حياتك .. انما أنت مجرد رد فعل لكل هؤلاء الذين أعطيتهم أنت أدوار تفوق حجهم الحقيقى فى قصة حياتك
وأصبحت أنت بلا دور !!

فى الطريق للبحث عن دورك وعن حياة 
حاذر أن تكتشف انك انت ميت ولا تشعر 

الاثنين، فبراير 06، 2012

اكتئاب مابعد الخذلان

يمر بها مرحلة لاتعرف لها سبباً
الا انه قد تكون "اكتئاب مابعد الخذلان "

كم من الاسماء وكم من الاشياء وكم من الاسماء والمواقف خذلوها

الا انها لم تلق لهم بالا فى أوانهم 

بحجة ان لديها الاهم الان

ولكن يبدو ان مقاومتها تنهار

هى مازال لديها الاهم 
ولكن انهيار مقاومتها لا سبب واضح له

لَيْسَ لَهَا مِن دُونِ اللَّهِ كَاشِفَةٌ

هى لا تنتظر معرفة سبب انهيار المقاومة
هى فقط تبحث وبشدة كيفية الخروج من هذا الانهيار 
ولا تسألكم سوى الدعاء


السبت، فبراير 04، 2012

مافيش اختيار




كتبتها من كام يوم 
وحاسة انى عاوزة اكتبها تانى 
مش عشان اى حد 
انما عشان نفسى 
عشان دايما افكر نفسى 
انه
رغم كل الى بيحصل
أنا ماليش غير البلد دى
ماعنديش اختيار انى اسافر برا
لاابويا فى السعودية .. ولا ليا عم مهاجر كندا
ولا جوز خالتى شغال فى سفارة تركيا
للاسف او يمكن لحسن الحظ .. عيلتى كلها هنا فى مصر
وانا طول عمرى هنا 
عمرى ماسافرت برا
ومش واضح ان دا متاح فى المستقبل القريب

عشان كدا مافيش قدامى احتيارات غير انى ادور على كرامتى فى البلد دى
حتى لو تمن كرامتى انى اموت
محدش يقول انا بكره مصر ,, مصر ملهاش ذنب
احنا الى سيبناها للكلاب
يحكموها
وقلنا احنا وهما ايد واحدة 
###
انا واثقة ان دا مش موقفى انا لوحدى 
فى ملايين غيرى معندهمش اختيار انهم يسيبوا البلد دى
وعاوزين يعيشوا بكرامة 


الجمعة، فبراير 03، 2012

المجد للشهداء ,, العار والخزى والذل لنا



ماذا سنحكى لأبناءنا عن موقفنا مما يحدث الآن ؟!!
يكفيهم شرفاً وفخراً أنهم قُتلوا لأنهم يوماً ما دافعو عن كرامتهم وكرامتنا
ويكفينا عاراً وخزياً وذلاً أننا بنكيهم من خلف شاشتنا بكلمات باردة لاتعكس سوى تمسكنا بحياة بلا كرامة 

لا كلمات تُقال 
فقط صورهم تتحدث












**
هل سيصنع فارقا ان كتبت تحت صورة احدهم انه فى كلية هندسة
او كتبت تحت صورة اخر انه متطوع فى جمعية رسالة
او اخبرتك عن الثالث انه فقط 15 عام ؟!!
***
تبقى الحقيقة .. هناك اكثر من 70 اسرة باتت ناقصة احد افرادها
هناك سرير .. لن ينام عليه صاحبه مرة اخرى للابد
هناك شلة اصدقاء سيغيرون حتى الشارع الذى اعتادو التمشيه فيه لفترة .. حتى تتقبل انفسهم فكرة الموت
***
وهذا المشهد
هل تعلم ماذا يفعلون 
كل شخص يبحث عن جثة فقيده فى وسط الجثث !!
***
ومازالوا يقتلوا اطهر واشجع من فينا .. هناك فى شارع منصور المطل على ميدان التحرير
***
ومازلنا نحن على خزينا وذلنا وعارنا
***
ويبقى السؤال






***

ملحوظة .. الصور قابلة للزيادة .. ابحث عن صورتك .. او ارسلها الى لانى اعلم انى ساضمها قريبا

الخميس، فبراير 02، 2012

حداد





حداد

فى الذكرى الاولى لمعركة الجمل
والذكرى الرابعة لشهداء عبارة السلام 98
80 شهيد جديد .. فى احداث شغب بمبارة كروية 

يـــــســـــقـــــط  يـــــســـــقـــــط  حـــــكـــــم الـــــــــعـــــــــــســــــــــــــكـــــــــــــــر

الأربعاء، فبراير 01، 2012

حاجات صغيرة .. وتبسِط :)

فى حاجات صغيرة جداااااااااااااا
بس أنا بحبها جداااااااااااااااااااااااااااااااااااا
وبتبسطنى جداااااااااااااااااااااااااااااااااااااااااااااااا جداااااااااااااااااااااااااااااااااااا


قررت انى فى البوست دا ارصدها .. عشان كل لما اتضايق افتحها واتفرج عليها .. واتبسط :)




**

اتبسطت .. لما واحدة زميلتى مرة كلمتنى وقالت لى عاوزة افضفض معاكى شوية
ورغم اننا زمايل مش اصدقاء .. بس قالت لى انا شفتك مبتسمه الصبح .. وحسيت انك راضية اوى ^_^

**

اتبسطت .. لما بنوتة صغيرة مكملتش سنتين .. كانت موجودة فى الجمعية امبارح .. وقالت لى ياثوثو ^_^ 

**

اتبسطت .. لما صديقة الطفولة الى حنتها بكرة .. قالت لى بهزار .. أجل الفرح عشان خاطر تحضريه يعنى ^_^
ورغم انها بتسال بهزار .. بس اتبسطت اد ايه هى زعلانة انى مش هكون موجودة :D

**

اتبسطت .. لما اختى الصغيرة رسمت لى رسمة " بو " وخبتها فى وسط ورقى عشان ابقى اشوفها وانا بقرا الكتاب ^_^

**

اتبسطت . لما ست جارتنا عجوووووووووووزة جداااااااااااااا ربنا يديها الصحة .. وانا دايما بسلم عليها وفاكرة انها مش عارفانى .. الاقيهافى يوم بتنادى عليا باسمى وتقعد تدعيلى كدا من الباب للطاء ^_^

**

اتبسطت .. لما قابلت موظفة عندنا فى الكلية انا بحبها جداااااااااا فى مسيرة من شبرا للتحرير يوم 25 يناير 2012 
الثورة مستمرة :)

**

اتبطست .. كل مرة بقرا النوت بتاعت 25 يناير 2011 .. انا كنت صح :)

**

اتبسطت .. كل مرة حد يقولى .. انتى بقى شيماء الزين الى بيقولو عليها ؟!!

ورغم انى عمرى ماعرفت بيقولو عليا ايه .. بس كفاية انى مشهورة يعنى :))

**

اتبسطت .. لما لقييت صفحة مشهورة على الفيس وناشرة كلماتى
اى نعم من غير اسمى .. بس عادى بقى .. كويس ان الكلام عجبهم ^_^

**

اتبسطت .. مع كل مكالمة مش متوقعاها من حد بقالى كتير مش سالت عليه 
او مسج :)
او حتى رسالة على الفيس

**

اتبسطت .. لما كنت مفلسة ,, وبحط ايدى فى جيب بنطلون لقيت عشرين جنيه :))

**

اتبسطت .. فى كل مرة اسمع اغنية لانغام .. والاقاها منطبقة عليا .. الست دى مبتهزرش ياناس :$

***

اتبسطت .. لما مرة نمت محتارة اوووووووى .. وصحيت على اية قرآنية بتقول 
إِنَّ اللّهَ لَذُو فَضْلٍ عَلَى النَّاسِ وَلَـكِنَّ أَكْثَرَ النَّاسِ لاَ يَشْكُرُونَ
الحمد لله :)


اتبسطت .. انى كتبت التدوينة دى .. وانى رجعت ادون تانى :)

يارب اشوفكو بكرة :)