جوا البيت اللى على الناصية .. وفى الـــــــــــــدور الأول
فى بنت بتكتب بقلم مكسور
وأخوها بيلعب .. بحصان مسحور
وأبوهم .. وأبوهم بيحلم يأكلهم رغيف عيش ..
من غير مايتأخر فى الدور
***
جوا البيت اللى على الناصية.. وفى الـــــــــــــدور التانى
فى حلم جبان .. أو يمكن بس سقعان
فى كلمة خرجت من شفة .. بس ملقيتش ودان
فى رأى خايف يطلع صح .. فيكون غلطان
***
جوا البيت اللى على الناصية .. وفى الـــــــــــــدور التالت
هتلاقى شقة .. مافيهاش حد
أصحابها سابوها .. بعد ماوصلو لسكة سد
خبط مهما تخبط .. واضرب الجرس
ولاعمرك هتلاقى رد
***
جوا البيت اللى على الناصية .. وفى الـــــــــــــدور الرابع
هتلاقى صوت كتير .. وهيصة وفرح
هتتمنى تتفرج .. وتتمنى لو صاحب الفرح سمح
بس قالك لا.. دا الفرح قليل
ويوم مااتوزع جرح !!!
***
جوا البيت اللى على الناصية
حواديت كتير
عيون جارحة .. وعقول سارحة .. وقلوب بتغير
وغناوى وحكاوى ومزامير
بس البيت من برا يبان هادى
وكأن زيه زى أى بيت عادى
ولما تسألنى عن السبب
أقولك بدون غضب .. أو عجب
أصله .. البيت اللى على الناصية
***
من كلماتى
17 مارس 2008
تحفه بجد تسلم ايدك
ردحذفربنا يكرمك :)
ردحذف