مولد (المجلس العسكرى )

انهرده 23 مايو 

من كام يوم ظهرت الدعوات ان اليوم دا يكون يوم التدوينات (عن) المجلس العسكرى لكسر حاجز الرهبة فى الاعلام عنه

وعشان مش بايدنا نعمل فرعون جديد

طبعا لا أدعى انى من المدونين .. ولا أدعى استيعابى لحاجات كتيرة بتحصل فى البلد

ومن هذا المنطلق هسأل .. هو ليه مينفعش اتكلم عن الجيش يعنى !!!
وليه الموضوع محتاج مولد كدا وصاحبه الحمد لله موجود .. بس عامل نفسه غايب

واحد صحبتى بتقولى كويس عشان يعرفو كل اللى ضد الجيش ويلموهم فى زنزانة واحدة

طيب هو كل اللى بيتكلم عن الجيش يبقى بيتكلم ضده !!!

عادى يعنى طنطاوى وعنان رجالة مبارك .. بس هما شافو الشعب عمل ايه فى مبارك وبالتالى ممكن يعملو انيل فى رجالته

الاوامر عدت من الظباط الكبار والظباط اللى فى الشارع هما اللى رفضو الضرب برضه عادى ياجماعة .. كل مكان فيه الحلو وفيه الوحش

احنا خلاص قفلنا الصفحة دى وبلعنا القسية عشان قلنا الجيش مكنش فاهمنا صح

انما دلوقتى الجيش عارف هو بيتعامل مع مين

الكلام دا بيتقال عندنا هنا فى الفلاحين وفى المواصلات بين القرى وبعضها .. مش كلام النخبة ولاحاجة

الناس فاهمة يعنى

بس المشكلة ان الناس مستغربة 

هو امن الدولة بيشتغل يعنى مع الجيش دلوقتى ولا ايه ؟!!

طيب طول عمرنا عارفين ان ظابط الجيش مبيبحش ظابط الشرطة .. اشمعنى دلوقتى الجيش شايل الشرطة كدا على كفوف الراحة  !!!

طيب الجيش سايب رجالة مبارك فى كل حتة ليه .. ولازم الناس تضغط ولازم الناس تنزل مظاهرات ولازم الناس تولع فى بعض زى ماحصل فى قنا

الناس بس عاوزة تفهم نقطة واحدة

المجلس العسكرى بيعمل حساب لمين وعشان كدا مبيعملش حاجة غير تحت ضغط جامد عشان يبقى الشعب هو اللى عاوز مش المجلس هو اللى عمل من نفسه !!!

وبجد ياجماعة بجد .. ايه المشكلة انى اكتب الكلمتين دول من غير مايكون فى مولد مخصوص كدا للكتابة عن المجلس !!!