طبعا العنوان هو تحريف لجملة مشهورة لصفر الجيل تمورة
وبجد الجملة حقيقة جدا
عزيزى المواطن .. حب الثورة هتحبك وتدلعك وتديك كل اللى انت عاوزه منها
شوف ياننوس عين مصر -ماهى مصر هى مامتك بقى - الثورة واقع لامفر منه
صدق أو لا تصدق فى مواطن تانى زيك كدا بالظبط ليه مناخير وعينين وودنين واوبشن المخ برضه نازل معاه وسبحان الله بيفكر زيك -يعنى هو مش أحسن منك فى حاجة خالص- المواطن دا بقى عنده استعداد ينزل الشارع كل يوم لحد ماثورتنا تكمل
وثورتنا دى ياننوس عين مصر هى ثورتى وثورته وصدق او لاتصدق برضه ثورتك انت كمان
عارف ليه ثورتك انت كمان !!!
عشان -صدق أو لا تصدق للمرة التالتة - انت مستفيد منها حتى لو انت معترض عليها
جرب كدا تسافر برا دلوقتى !!! .. هتلاقى سبحان الله لاسحر ولاشعوذة الدنيا كلها بتحترمك
طيب خلى مدير ولا رئيس شركة ولا اى حد كبير كدا شوية يعنى يقرفك فى عيشتك انت وزمايلك فى الشغل
او دكتور فى الجامعة يضغط عليكو عشان تشترو الكتاب
هيبقى شكرا ياكبير جدا وبالسلامة للمدير او الدكتور
طيب يامواطن منك له لما يبقى الناس سايبة بيوتها ونازلة تجيب لك حقك من واجبك الاولى انك تعرف هما نازلين ليه
ولازم برضه ولابد وحتما تدافع عنهم
طيب تعالى نتكلم من منظور تانى
عمرك قريت صحيفة قومية ايام المخلوع ؟!!
شفت أسامة سرايا ازاى كان بيتغزل فى حكمته كأنه قيس وبيتكلم عن ليلى !!!
طيب فاكر طشة الملوخية بتاعت القط ؟!!
طيب بقى شفت سماجة عبد الله كمال وهو بيحارب الثورة وبيدافع باستماتة عن رب عمله ؟!!
الناس دى يامواطن مكنوش بيكدبو
الناس دى كانت عارفة ان مصلحتهم فى النظام .. وعشان كدا كانو بيعشقوه
ومن باب يعنى " اللى يتجوز امى اقوله ياعمى "
طيب ياسيدى دلوقتى امك خلعت مبارك واتجوزت الثورة .. امشى مع مصلحتك كدا ومصلحة ولادك .. هتلاقيك والله بتحب الثورة ومستعد تضحى عشانها
انهرده كنت راكبة مواصلة وقبل ماتيجى محطتى بدقايق لقيت 2 ستات بيتكلمو عن اللى نزلو انهرده وواحدة بتقول هما عاوزيين ايه مااحنا صبرنا 30 سنة نصبر كمان سنة ولا اتنين !!!
طبعا هى كلمة حق لكن فى غير موضعها خااااااااااااااااااالص
قلت لها لا انتى عارفة ان صفوت وزكريا وسرور تجميد فلوسهم ومنع سفرهم محصلش غير بعد الاعلان عن المظاهرة بتاعت انهرده
طيب انتى عارفة ان المشير متجوز اخت صفوت الشريف !!!
يعنى لازم الشعب يضغط عشان الجيش والحكومة يعملو حاجة .. ولو غفلنا لحظة هنتاكل
وعديت محطتى وفضلت أتكلم معاهم -وطبعا كعادة المصريين العربية كلها اتدخلت فى الحوار-
وساعتها اللى نفعنى فى موقفى حاجتين
انى متابعة وعارفة ومش بقول اى كلام عشان فلان او علان قاله
والحاجة التانية والاهم انى بتكلم عن الثورة بحب
اه بجد
انا بحب الثورة
وعشان كدا اتأخرت على مشوارى وكملت معاهم لاخر الطريق عشان اتكلم عنها
عمرك جربت تحب حد ؟!! .. عارف الاحساس انك فرحان وانت بتتكلم عنه وبتسمع الناس وهى بتجيب سيرته .. وياسلام بقى لو واخدين فكرة غلط عنه وانت بتصلحها !!!
عارف الاحساس دا
انا بحسه دايما مع الثورة
حب الثورة هتحبك وهتحسسك انك بطل من ابطالها
اكرف الثورة هتديك باللى فى رجليها وهتدوس عليك وهتكمل ان شاء الله
***
ملحوظة بسيطة
"وانا نازلة من العربية قلت لهم يبقى بقى ندعى للى بيضحو براحتهم عشان مصلحتنا واحنا كل واحد عايش حياته ولا على باله .. العربية كلها قالت ربنا ينصرهم :) "
حب الثورة عشان تكسب دُعا من القلب الصافى مع عقل فاهم :)
أزال أحد مشرفي المدونة هذا التعليق.
ردحذفشكرا
ردحذفرائعه جدا جدا يا شيماء
ردحذفالى مزيد من التوفيق ان شاء الله
هقول نفس الكلام . كلام زى الفل والله
ردحذف:)
ردحذفبدايـــة مشرقة
( ^__^ )
شكرا للردود كلها وللتشجيع :)
ردحذف