هكتب كام نقطة كدا سجلتها فى النوت بتاعتى خلال اسبوع فى مدينة الاقصر المصرية
pretty little things
" .. دا عنوان قصة لقتها فى ريسيبشن الفندق اللى نزلنا فيه .. فندق شادى
·
فعلا مصر مش ميدان التحرير بس .. مصر اكبر بكتير .. اللى فى الميدان فاهم هو فى الميدان ليه بس لازم بقية الناس تفهم .. فى السوق قابلنا واحد قالنا "" احنا بنحب اهل مصر وهما عملو ثورة حلوة .. بس اذونا فى اكل عيشنا " ..... دا حتى المرشد السياحى اللى المفروض مثقف وواجهة للبلد تحس كلامه هجوم على الثورة !!! .. الناس دى غلابة بجد ودا اكل عيشهم لازم حد ينزل يتكلم معاهم
· ادخال الدين فى السياسة بيبوظ الدين وبيبوظ السياسة .. المرشد السسياحى كان بيحكى عن تاريخ الاسر الفرعونية وقال انه لحد الاسرة 26 كان ملوك بيحكمو مصر .. بعد كدا بدا الكهنة يملكو .. والعصر دا اسمه عصر الاضمحلال !!!
· الكوسة اختراع مصرى اصيل .. دا اللى اكده حكاية المرشد السياحى عن الاحتفالات الملكية الفرعونية كل 30 سنة .. المفروض يتم اختبار قوة الملك كل 30 سنة عن طريق مصارعة مع ثور .. لو الفرعون قتل الثور يبقى فرعون قوى ويكمل فى الحكم لو الثور قلب عربية الفرعون يبقى فرعون خيخة ويتم استبداله .. والمرشد بيقول ان البرديات بتحكى ان الثور اساسا بتيجى مخدرة عشان الملك يقتلها علطول .. تفتكرو فى سر معين ورا رقم 30 دا
· لما تقرب من حد اوى بتشوف عيوبه اوى .. عشان كدا حلى حاجة نظرية القنافد .. الاقتراب عن بعد .. اصل النظرية دى ان القنافد فى الشتا بتكون عاوزة تتدفى بس لو قربت من بعضها اوى هتشوك بعض ولو بعدت عن بعضها اوى مش هتتدفى .. فبتقرب من بعضها بمسافات محسوبة عشان تتدفى وفى نفس الوقت متشوكشش بعضها .. احنا كبشر محتاجين اوى نظري القنافد دى عشان نعرف نعيش
(سمير فرج – الاقصر) ... حاول تحطهم فى جملة مفيدة مش هتلاقى .. اى جملة هتكون ضرر للاقصر .. دا بناء على كلام الاهالى هناك محدش بيحبه وواضح من كلام الناس ان وراه بلاوى ياما .. لدرجة ان فى يافطة متعلقة فى شارع رئيسى بتهاجمه !!!
· ايه موضوع الناس بتوع طريق الكباش دا !!! .. اللى فهمته ان حكومة نظيف هجرتهم من بيوتهم غصب واقتدار ومن غير اى تعويضات عشان تكمل طريق الكباش !!! ... يعنى دا كلام ؟ .. محدش اتكلم عن الناس دى ليه ؟ .. هو دا تشجيع السياحة .. هو دا حق المصرى والمواطنة ... ياريت الموضوع دا يوصل للجيش عشان يتصرف .. او اسهل الجيش يعين محافظ مصرى للاقصر وهو يهتم بالموضوع دا
· حركات المراهقة مش بتبقى فى سن المراهقة .. ممكن جدا الواحد يوصل فوق التلاتين ويبقى لسه مراهق .. وساعتها مينفعش حد اصغر منه يقوله انت مراهق .. طيب الاصغر دا المفروض يعمل ايه يعنى !!! اهو دا اللى مش عارفاه L
· احلى حاجة تيجى من رحلة اسوبع فى الاقصر على امتحانات .. بتحس نفسك كنت طاير فىوق فى السما وفجاة جه قفا من الدنيا ظبطك وقفك على الارض
· تذكرة قطر القاهرة اسوان درجة تانية مكيف بقالها 3 سنين – ويمكن من قبل كدا – تمنها ثابت .. فى حاجة تانية ثابتة غير تمن التذكرة ؟
· احيانا بندمن غلطة معينة .. وبنعملها واحنا عارفين انها غلطة جامدة اوى فى حق نفسننا .. مش هى دى المشكلة .. المشكلة ان فى ناس قريبة مننا بتزعل بسبب الغلطة دى .. الغلطة مش هتأذيهم هما فى حاجة بتأذينا احنا ... انما هو بيزعلو عشانا مش مننا .. واحنا برضه لسه بنغلط نفس الغلطة
· فى شخصيات زى القمر .. بمعنى انها من بعيد منورة وبتجذب كل البشر وبتنور اوى واللى حواليها كمان ممكن يسهرو مخصوص عشان يشوفوها وممكن يخلوها رمز للحب ورمز للوفاء .. لكن لما تقرب منهم بالظبط زى ماتقرب من القمر .. ماتلاقيش غير شوية حفر وظلمة .. وتكتشف ان النور دا كان مجرد انعكاس جسم تانى خالص عليهم
الصورة دى عبارة عن السما وتحتها الجزء العلوى من الجبل المنحوت فيه معبد حتشبسوت الجنائزى فى البر الغربى فى الاقصر .. من تصويرى ^_*
:)
ردحذفجميل
شكرا :)
ردحذف