(المقال وجهة نظر شخصية بحتة .. غير ملزمة لاى حد .. ولم تتطرق لوجهة النظر الدينية على الاطلاق .. تفاديا لبعض الاختلافات فى التفسير )
ملحوظة تانية .. اكيد البوست ليه تكملة ان شاء الله مش دا كل الموضوع بس انا مش عاوزة انزل بوست طويل :)
ملحوظة تانية .. اكيد البوست ليه تكملة ان شاء الله مش دا كل الموضوع بس انا مش عاوزة انزل بوست طويل :)
هل فى أى تناقض فى العنوان ؟!!
من وجهة نظرى الشخصية مش شايفة اى تناقض .. امال ليه الناس اللى حواليا شايفن تناقض ؟!!
من وجهة نظرى ان ربنا خلق الراجل والست لتعمير الارض .. الراجل يتعامل مع الجبال والطبيعة والطب والهندسة والعلوم .. والست ليها مهمة اكبر واشق واعمق .. هى بناء بنى ادم !!!
طبعا الكلام دا بيفسرو بعض الناس بمقولة "تقعد فى البيت تربى العيال وتقشر البصل " .. اوك الست هتقعد فى البيت تربى العيال وتقشر البصل .. لكن هل هو الموضوع سهل كدا انها تربى العيال
او بمعنى ادق بقى ... هو بقى اى حد كدا يبنى شخصية طفل ؟!!
الاجابة طبعا لا
والدليل ان فى اطفال شوارع
وان فى مجرمين
وان فى نصابين
وان فى هتلر
وان فى مبارك ونظيف وعز وجرانة والسباعى !!!
كل دول مبقوش مجرمين كدا من العدم .. دول نتيجة تربية غلط .. يعنى نتبجة ان امهاتهم مكنش عندها شخصية مستقلة ولا عرفت تحقق ذاتها -انا مش بشتمهم بامهاتهم على فكرة انا بس بوضح وجهة نظرى :D -
تربية طفل محتاجة تربية امه ذات نفسها الاول
عشان كدا فى كلية اسمها طفولة .. وفى علم اسمه علم التربية .. وفى العرب فى مستشار علاقات اسرية .. (طبعا دا غير محكمة الاسرة ومجلس الطفل ووالمؤسسات الفاشلة اللى عندنا دى عشان دول عالم نصابة من الاخر )
حتى فى الاسلام سيدنا النبى قال ان اولى حقوق الطفل على ابوه انه يختارله ام كويسة !!!
سيدنا النبى شدد على اختيار الام لانها هى اللى بتكتب الاول على الورقة البيضا اللى اسمها الطفل
طيب نيجى بقى لأغلب الاشكال النمطية فى مجتمعنا اللى صنعتها التربية الخطأ ووسائل الاعلام
اول نموذج
نموذج البنت التافهة اللى عملته وسائل الاعلام .. نموذج البنت المهتمة بالموضة واخبار تمورة وعمورة ومكياجها ولبسها وخروجاتها مع اصحابها - ومفيش مانع كمان البوى فريند فى المستويات الاجتماعية الاعلى شوية -
النموذج دا بيعتمد على الشكل الخارجى المبهر للبنت واللى بيكون كل مهتمها فى الحياة انها تنول اعجاب عيون الناس
والنموذج دا غالبا بيفضل كدا لحد اخر العمر كل همه اللبس والخروج الخ
حتى بعد الجواز بتنتج كيانات بشرية - اللى هما الاطفال - زيها
وهى دى الام اللى بتربى ولد مخلص كل فلوسه على جيل لشعره .. وبيزعل اوى من الجيش بس عشان هيحلق !!!
الست دى لابتربى العيال ولا بتحقق نجاح فى شغلها .. لان زى ماكلنا عارفين مش اى واحدة جابت بيبى وربته وودخلته مدارس وجامعة واتخرج واشتغل يبقى ربت بنى ادم -راجع النواصى وشوارع وسط البلد والكورنيش !!!-
وبالنسبة للشغل فهى فى تسعين فى الميا بتشتغل شغل يعتمد على شكلها -واللى غالبا مبيكونش منتج - او بتعتمد على الدلع و***** حاجات تانية عشان حد يخلص لها شغلها او المدير يعمل نفسه مش واخد باله من اهمالها !!!
النموذج التانى ..
نموذج البنت ست البيت .. البنت دى كل اهتمامها بلطبخ والغسيل وفرش البيت .. فى بيت ابوها كل مهمتها انها تنفذ طلبات ابوها واخوها وخالها وعمها واى مذكر فى محيطها العائلى
طبعا البنت فى النموذج دا عمرها ماتفكر تفتح برنامج توك شو تسمع اخبار الدنيا ولا نشرة اخبار .. وطبعا لو اتفرجت على ماتش كورة دا يبقى خيال علمى !!!
النموذج دا بيربى اطفال قابلين للتشكيل من المجتمع .. بمعنى انها بتديهم اولويات الاولويات وبعدين التليفزيون والمجتمع بقى يتولى الباقى - طبعا دا فى حالة ان الاب مالوش شخصية قوية يفرضها على الاولاد -
طبعا لو حظها حلو العيال بيتعاملو معاها على اساس انها ست بركة ومبحبوش يزعلوها وعاوزيين يفرحوها
انما بقى لو حظها وحش العيال هيستغلو طيبتها المفرطة -ونقدر نقول جهلها- ويبقو نموذج اسوأ من اللى اهله ربوه على الغلط
لانه هيكون عنده استعداد يجرب اى حاجة !!!
النموذج التالت ..
نموذج المرأة المسترجلة ... اللى شايفة ان الطبخ وشغل البيت دا اهانة لعقلها .. والمكياج والموضة دا اهانة لجسمها
النموذج دا بيكون قالب على راجل وغالبا بيكون عقله كويس ومتابعة .. بس باسلوبها بتنفر اللى حواليها من المعرفة
وبيخلى اللى حواليها - وخصوصا الرجالة - يلعنو الثقافة على تشغيل المخ
وفى الاخر تلاقى الواحد منهم يقولك الست ملهاش الا بيتها .. عنادا فى نموذج المرأة المسترجلة !!!
طيب ايه الحل ؟!!
الحل ان الست اللى بتبنى فى المجتمع لازم تكون 3*1 بمعنى ان النماذج اللى فوق دى غلطتها انها خدت جانب واحد فى حياتها واتعمقت فيه ونسبت الجانبين التانيين !!!
نقطة اخيرة
مش معنى ان الست مهمتها فى الكون تربية طفل انها تعيش ال25 سنة الاولى من حياتها ترسم على عريس !!!
فى ناس اكيد مش فى قدرها انها هتتجوز فى يوم من الايام
لازم تبنى نفسك عشان تعمرى الكون .. بالطريقة بقى اللى ربنا يختارها .. وطول مااانتى ماشية فى الارض هتربى ناس .. من موقف بتعمليه او وجهة نظر بتقوليها
موضوع جميل يا زينة
ردحذفالسلام عليكم ورحمة الله وبركاته
ردحذفالموضوع بصراحة من حيث الفكرة فهى جميلة جدا واكيد مفيش عليها اى اختلاف ولكن
بالنسبة لل 3 انماط اللى ذكرتيهم فاعتقد ان الاعلام والتربية الخطا اللى انتى ارجعتى ليهم السبب الرئيس فى تكوينهم اثرو عليكى فى تحديد الانماط دى لانها من وجهة نظرى لا تمثل او على الاقل ينقصها انماط اخرى احق ان تذكر من اهمها نمط الامهات الذى اخرج جيل اقام ثورة ضد ظلم وفساد لانه ممكن نقول زى ما قطامش قال مع قليل من التحريف فبصرخة جيل سيس (الاعلام هو اللى صوره بالشكل دة) سقط نظام ورئيس
ولكن التانية تكمن فى الحل.فانتى لم تذكرى الحل الجذرى للمشكلة انما كان حلك هو دمج لثلاث انماط وكما قلت فى السابق انها لا تمثل الجميع او جميع الصفات الحسنة منفردة حتى يكون دمجها هو الحل.فى خطبة الجمعة انهاردة كان الموضوع عن اختيار الزوجة الصالحة او بمعنى اخر اخر الام الصالحة للاولاد.والمعيار الرئيسى فى هذا هو الدين
فان اردتى اما تهتم بجمالها وشئون مجتمعها وتربية اطفالها وراحة زوجها فابحثى عن اما ذات دين.وابحثى عن زوج يختار لاولاده ام ذات دين..وابحثى عن اب يختار لابنته زوج ذا دين
شكرا واسف عالاطالة
like so much
ردحذفبس دى وجهه نظرك؟
التعليق الاول .. شكرا
ردحذفالتعليق التانى .. انا هعمل تحديث دلوقتى ياريت تشوفه
ردحذفوانا مجبتش سيرة الدين لان لو هنتكلم من وجهة نظر دينية دى عاوزة بوست تانى لو حدها :)
@eso
ردحذفاكيد دى وجهة نظرى .. وعشان كدا كتبتها :)
كلامك كله مظبوط بس تفتكرى ايه النمط المطلوب حاليا
ردحذفهتكلم عن نفسى انا انا عن نفسى مش عايزة اربى ولاد زى ما اتربيت بالعكس عايزة احسن عايزة اعرفهم عن دا ودا
التربية مش سهلة خالص والدنيا والعيشة مش اكل وشرب بس
كلامك كله مظبوط فى حاجات تغيظ بقى زى اللى يقولك بتتعلم ليه ما مسيرها لبيتها بحس بغيظ والله لما بسمع كدا حتى لو مش هشتغل بس بيت واحده متعلمة غير بيت واحدة مش اتعلمت ودا اكيد
بحترم كلامك وعقلك ^_^
@nesma
ردحذفبالنسبة للنمط المطلوب هى مش 1+1=2
لا دى طبيعة بشرية .. وكل واحد ممكن يكون احسن بطريقته
لكن اللى عاوزة اوصله فعلا .. انك لازم تحترم البنت وتعرف انها بنى ادم كامل الاهلية .. لان مهمتها على كوكب الارض هى اعظم مهمة
هو طبعا دور الام فى التربية دور عظيم جدا وماحدش يقدر يقلله وانا معاكى فى كلامك بجد بس هى المشكلة ان بطبيعة الحياة الى عايشنها لازم الام تخرج للشغل فى الى بتقدر تجمع ما بين الوظيفتين وفى الى مابتعرفش
ردحذفتمام انتى عندك حق .. بس مش لازم الام تشتغل .. ومش لازم متشتغلش !!!
ردحذفمش مهم هى هتعمل ايه !!! المهم تعمل اللى هى مقتنعة بيه وباتفاق مع الزوج اكيد وباقتناعه كمان
او على الاقل باقتناعه بانها حرة تختار ازاى تنظم حياتها
هو انا الحمد لله قررت انى مش هتجوز عشان مدخلش فى هذا الفيلم الهندى ,,, بصى انتى قلتى 3 انماط من انماط كتير اوى ... يعنى مثلا انا امى بتهتم بشكلها و كانت بتشتغل و بتطبخ و بتنضف و بتربى و بتزعق و بتفكر و بتعمل كللللللل ما تتخيليه , بس برضو معرفتش تربينى هاهاهاهاهاه ))))
ردحذفالعنوان مفهوش تناقض و لا حاجه
ردحذفبس بكل بساطه الناجح بينجح فى اى مكان هو فيه
مش يتشرط انه علشان ينجح انه يبقى فى مكان معين
يبقى مينفعش واحده تقول انا مستنيا دورى انى ابقى ام علشان انجح فى تربيه جيل من العظماء
يبقى لازم انتى تبقى عظيمه قبل ما تكونى ام و قبل ما تكونى زوجه .... فين انجازاتك انتى ... فين طموحك
اللى فعلا عاوزه تبقى شخصيه مستقله و تحقق ذاتها فى تربيه العيال ... يبقى دا اختيارها ... مش لان دا اجبار
يبقى متبقيش قاعده مستنيه العريس خمس ست سنين و لا حتى 10 سنين و فى الاخر تقولى انا حققت ذاتى و دا قرارى
تحقيق الذات يبقى فى الاختيار مش فى عدم الاختيار
فى التنازل عن وظيفه و ساعتها مش هيبقى تنازل هيبقى انتقال من عمل لعمل
بالنسبه لاول نموذج
وسائل الاعلام مش بتعمل نماذج ... هى بتنقل صوره واقعيه موجوده فعلا و محدش ينكر ان التفاهه موجوده
(و اللى مش مصدق يشوف ستار اكاديمى)
الخلاصه
ذى ما انتى قلتى لازم البنت تبقى 3*1
تبنى شخصيتها بنفسها تشوف هى عايزه ايه
بس برضه مش هتلاقيها مشكله البنت بس هتلاقيها مشكله تفكير شعب و عادات و تقاليد و افكار صعب انها تتغير بس مش مستحيله
ليه الولد و البنت ميحاولوش يتقابلوا فى نص الطريق
ليه الولد لازم يمشى طريق الشقه و العفش و المهر و الماديات كله لوحده
و ليه البنت لازم تمشى طريق كلام الناس و تربيه العيال و تعب البيت لوحدها
ليه الشراكه متبتديش قبل الجواز؟؟؟